La stampa ladina
Con dut che la situazion politica dal 1945 inant é dassen descorajanta y che les normes contegnudes tl statut de autonomia 1948 é de puecia brancia, laora les unions di ladins inant con determinazion y idealism. De merz dl 1949 végnel fora per l prum iade, sun scomenciadiva de Salvester Erlacher (1910-1991), l sfuei "Nos Ladins", empruma n iade al meis y spo doi iadesc al meis. Les Unions de valeda, chela dla Val Badia y chela de Gherdëina y la Union Generela ne é nia enstesses editoures, ma ales sostegn l foliet de vigni vers enfin al 1972 canche la Union Generela di Ladins sourantol te sies mans la edizion de n sfuei de informazion. Chest foliet giata l inom "La Usc di Ladins" y vegn dé fora desche mensil enfin al ann 1985, dedò vigni chindesc dì enfin al 1990 y dal 1. de fauré 1990 inant desche edemanal.
“Nos Ladins” (1949).
“La Usc di Ladins” (2005).
Radio y televijion ladina
La Union Generela ti é dagnora steda do al potenziament dles trasmiscions radiofoniches per ladin. Do n valgugn agn de trasmiscions sperimentales de puec menuc a l'edema végnel arjont dl 1955 per merit de sie enteressament n ampliament dles trasmiscions radiofoniches che deventa regolares dal lunesc a la sabeda. Dl 1958 végnel ence metù su te Gherdëina l Comité Radio Ladin per auzé l livel dles trasmiscions. Dl 1961 végnel arjont na programazion culturala dlongia chela de atualité intitoleda "Dai Creps dl Sela". Al vegn tout su personal a temp plen.
Dl 1976 se para la Union di Ladins de Fascia deberieda con la Generela che la redazion de Fascia vegne destacheda da chela de Bulsan y metuda a Trent.
Dl 1979 vàl en ona trasmiscions sperimentales ladines tla televijion, ma per na programazion stabla tla tv méssen aspeté enfin al 1988.
Encuei pieta la RAI 352 ores de radiofonia y 39 ores de televijion ladina per la Region Trentino-Südtirol. Acioche ence i ladins de Anpezo y de Fodom posse se anuzé dl servisc radio-televisif se à les Unions di Ladins y la Generela festidié che al vegne metù su emplanc repetidours sun i joufs, ma ai resta dutaorela scluc fora da la programazion ativa.
Colaboradours dl Radio Ladin - RAI de Bulsan ti prums temps. En pe da m.c. Heinrich Zingerle, don Gustl Prugger, Bruno Moroder; sentei da m.c. Dolores Vittur, Luigi Piccoliori, Rita Stuffer e Ivana Talmon.
Media ladins y lingaz aministratif ladin
Cotanc é stés i intervenc dla Union Generela enfin a Roma per damané de vegnì reconesciuda desche esprescion dla "unité di ladins" y de giaté diretamenter dal Consei di Ministri da Roma n sostegn finanziar per podei laoré per l'unité di ladins soura i confins provinziai y regionai fora empede messei petlé con de gran dificoltés da provinzia a provinzia. Emplù se àla fat audí te dutes les fases de atuazion dl statut de autonomia te Südtirol, ghiran l reconesciment dl ladin desche lingaz ofizial y na lerch sostanziala per i ladins tl radio y tla televijion. Dl 1984 ne fòvel no televijion ladina, no scrit dant la doura dl ladin desche lingaz de aminstrazion ti comuns. Ti agn Otanta fova les revendicazions dla Generela sostanzialmenter: 3 ores de radio en di y 2 ores de televijion a l'edema y al dessova ester n servisc radio-televisif per dut l raion ladin, sclut ite Fodom y Anpezo.
L reconesciment dl lingaz ladin desche lingaz ofizial tl'aministrazion é vegnù a se l dé con la lege 574/88 juda en doura dl 1989. Dl 1993 ti végnel reconesciù ence ai ladins de Fascia l dert a la doura dl ladin tles aministrazions publiches.
Conferenza stampa a Bulsan en ocajion dla festa di “50 agn La Usc di Ladins”. D.m.c. Fabio Chiocchetti, Gianpaolo Soratroi, Ilda Pizzinini, Iaco Rigo, Georg Mussner y Elisabetta Menardi Dalus.
Ladin standard
Con la ofizialisazion dl ladin desche lingaz aministratif dl 1988 sénten l debujegn de ruvé a na forma scrita unitara. L'enciaria de elaboré les regoles per chest lingaz ti vegn sourandeda al pere dl rumanc grijon, l prof. Heinrich Schmid de Turic. Dl 1994 met la Union Generela y l Istitut Ladin “Majon di Fascegn” en pe l "Servisc de Planificazion y Elaborazion dl lingaz Ladin" (SPELL), a chel che al tol pert dal 1997 inant ence l Istitut Ladin “Micurà de Rü” y l Istitut Pedagogich Ladin.
L lingaz ladin scrit unifiché vegn empruma denominé ladin dolomitan y plu tert ence ladin standard. I laours de planificazion linguistica se concretiseia dl 2001 con la publicazion dla "Gramatica dl Ladin Standard" y dl 2002 con la publicazion dl "Dizionar dl Ladin Standard". La Generela met en pe n sie Ofize Linguistich che meina inant l projet. L ladin standard é l lingaz scrit ofizial dla Union Generela. Les provinzies y les regions mess ciamò l aprové ofizialmenter.